رحمكِ الله يا دكتور\ غادة درويش

السلام عليكم و رحمة الله و بركاته

أمبارح و أنا ببص على الفيس بوك بتاعي لقيت خبر بصراحة أنا أول مقريته مصدقتش الكلام المكتوب, و علطول عملت أتصال علشان أتأكد و للأسف طلع الكلام مظبوط أنتقلت إلى رحمة الله تعالى الدكتورة\غادة درويش أسكنكي الله فسيح جناته و كل أموات المسلمين

لمن لم يعرف من هى دكتور\ غادة درويش

هى من أحدى عمدان ألأكاديمية الحديثة بالمعادي و دا من رأي الشخصي بصراحة , كانت شخصية قمة في الأحترام و الأدب كانت محبة للطلاب و زملائها المعيدين و الدكترة ألي أكبر منها, بجد كانت بتساعد أي حد و بدون أنتظار للشكر أو لأي مقابل, أنا عرفتها من سنة أولى و أي حد في الكلبة عرفها و أكيد أكيد ساعدته و شفها ولو مرة على الأقل

أذا كنت في مرة بتسأل هيا فين في الكلية مش محتاج تسأل بس دور على معيدة محاطة بالطلاب بجد كل متشوفها تلاقيها محاطة بالطلاب بيحسوا أنها أختهم الكبيرة و تقولهم نصايح و أزاي يتخطوا أي حاجز واجههم في الكلية

أنا عن نفسي كنت بحب محضرتها جدا جدا جدا و هى كانت معانا في المشروع بتاعنا و بجد بجد فعلا ساعدتنا كتير كتير و مش بس في المشروع لأ في حاجات تانية, و أن في بعض الطلاب بيتعبوها جدا جدا جدا الكلام دا منها هيا لكن كانت بردوا بتساعدهم و الله العظيم مهما الطالب عمل فيها كانت بتساعده بردوا

ححكلكوا مناقشة كانت بيني و بنها شخصيا, كانت مرة بتكلمني على مهنة المعيد و الدكتور و أزاي هيا بتحب المجال دا لأنها بتعرف تساعد الناس و أنها بتبقى فخورة جدا و هيا بتساعد أي حد مع أن المجال دا الفايدة المادية بتاعته قيلية جدا بس هيا كانت بتبحث على القيمة المعنوية بجد

كل ألي أقدر أعمله علشان أردها جزء من خدمتها ليا أني أدعلها في صلاتي و في صيامي أن شاء الله في رمضان و أسأل الله أن يتقبل من هذا الدعاء

و أخيرا, أسأل الله أن يغفر لها ذنوبها و يكفر عنها سيئاتها و يجعل قبرها روض من رياض الجنة اللهم أمين أمين